Trosolwg o'r swydd

Rydym am benodi Arweinydd Endosgopydd Clinigol profiadol ar gyfer Academi Endosgopi Cymru. Mae’r rôl hon yn cynnig cyfle unigryw i lunio dyfodol hyfforddiant endosgopi yng Nghymru, gan gyfrannu at ddatblygiad proffesiynol gweithlu’r GIG tra’n sicrhau’r safonau uchaf o ran darparu a llywodraethu hyfforddiant. Bydd yr ymgeisydd llwyddiannus yn gweithio'n agos gyda'r Rheolwr Rhaglen a thîm y rhaglen i ddatblygu a chyflwyno rhaglenni hyfforddi o ansawdd uchel, gan gynnwys Rhaglen Hyfforddi 10 Llwybr Endosgopi, a chefnogi datblygiad proffesiynol endosgopyddion clinigol a'r gweithlu ehangach trwy gyrsiau academi a rhaglenni a achredir gan JAG. Bydd yr ymgeisydd llwyddiannus hefyd yn gweithio ochr yn ochr â'r Nyrs Arweiniol Endosgopi.

Mae'r swydd hon yn cael ei chynnig fel cyfle secondiad yn unig. Os dymunwch wneud cais, rhaid i chi gael cymeradwyaeth eich rheolwr llinell cyn ymgeisio. Mae’r swydd hon am gyfnod secondiad penodol ond gellir ei hymestyn neu ei gwneud yn barhaol ar ddiwedd y cyfnod secondiad yn dibynnu ar y cyllid sydd ar gael a’r gofynion busnes.

Prif ddyletswyddau'r swydd

Bydd yr Arweinydd Endosgopydd Clinigol yn ganolog i gyflwyno’r rhaglen hyfforddi Endosgopyddion Clinigol a chefnogi datblygiad proffesiynol endosgopyddion clinigol ar lefel genedlaethol. Byddant yn cefnogi’r datblygiad ac yn cymryd rôl ganolog yn y tîm darparu ar gyfer ystod o gyrsiau ar gyfer gweithlu Endosgopi’r GIG, cefnogi arweinwyr clinigol gyda gweithredu hyfforddiant, a sicrhau cydymffurfiaeth â chyrsiau achrededig JAG. Mae'r rôl hefyd yn cynnwys arweinyddiaeth strategol, gan weithio fel rhan o uwch dîm arweinyddiaeth yr academi endosgopi i ddatblygu a mireinio llywodraethu'r Academi, sicrhau ansawdd, a chefnogi'r model hyfforddi hub a spoke. Bydd deiliad y swydd yn cynrychioli Academi Endosgopi Cymru mewn fforymau a grwpiau allweddol, yn rheoli perthnasoedd â rhanddeiliaid, ac yn cyfathrebu’n effeithiol ar draws partneriaethau.

Mae'r gallu i siarad Cymraeg yn ddymunol ar gyfer y swydd hon. Mae croeso cydradd i siaradwyr Cymraeg a  Saesneg ymgeisio.

Gweithio i'n sefydliad

Addysg a Gwella Iechyd Cymru (AaGIC) yw'r corff gweithlu strategol ar gyfer GIG Cymru sydd â swyddogaethau statudol sy'n cynnwys addysg a hyfforddiant, cynllunio'r gweithlu, datblygu a thrawsnewid y gweithlu, arweinyddiaeth a chynllunio olyniaeth, a gyrfaoedd.  Ein diben yw datblygu gweithlu sy'n darparu gofal rhagorol i gleifion/defnyddwyr gwasanaethau ac iechyd rhagorol yn y boblogaeth. Rydym yn Awdurdod Iechyd Arbennig sy'n gweithio'n agos gyda'n partneriaid; Gofal Cymdeithasol Cymru, darparwyr addysg, cyrff proffesiynol a rheoleiddiol a Llywodraeth Cymru.

Mae AaGIC wedi ymrwymo i ddatblygu diwylliant mewnol o ddewis. Mae ein Gwerthoedd yn adlewyrchu ein meddyliau, ein teimladau a'n credoau o ran sut y byddwn, ac na fyddwn, yn ymddwyn ac yn trin eraill:

- Parch i Bawb ym mhob cyswllt sydd gennym ag eraill,

- Syniadau sy'n Gwella: Harneisio creadigrwydd ac arloesi, gwerthuso a gwella'n barhaus,

- Gyda'n Gilydd fel Tîm

Derbyniodd AaGIC Wobr HPMA ar gyfer Ymgysylltu â Gweithwyr yn 2019.

Yr hyn y gallwch ei ddisgwyl:

- cyfnod ymsefydlu corfforaethol ag amserlen Croeso 90 diwrnod,

- arweinyddiaeth dosturiol,

- proses arfarnu perfformiad ystyrlon sy'n seiliedig ar werthoedd,

- y cyfle i effeithio ar wasanaethau iechyd a gofal cymdeithasol a bywydau a lles pobl Cymru.

Mae llawer o'n cydweithwyr a'n rhanddeiliaid wedi gwneud sylwadau ar y cyffro a'r awyrgylch a olygwn drwy gydweithio fel "Un Tîm AaGIC". Ydych chi am ymuno â'r tîm hwnnw?