HealthJobsUK

Trosolwg o'r swydd

Ydych chi'n arweinydd blaengar sy'n angerddol dros  ragoriaeth gofal iechyd a hanes llwyddiannus o arwain sefydliadau trwy newid diwylliannol? Mae Bwrdd Iechyd Prifysgol Betsi Cadwaladr (BIPBC) yn dymuno penodi gweithiwr proffesiynol strategol sy'n cael ei ysgogi gan ganlyniadau i ymuno â'r sefydliad fel Cyfarwyddwr Gweithredol Gwasanaethau Pobl a Datblygiad Sefydliadol.

BIPBC yw un o’r sefydliadau iechyd a gofal cymdeithasol integredig mwyaf yn y DU, yn gwasanaethu poblogaeth Gogledd Cymru ar draws chwe sir. Mae’n darparu ystod lawn o wasanaethau ysbyty sylfaenol, cymunedol, iechyd meddwl, acíwt ac arbenigol ar draws 3 ysbyty acíwt, 22 ysbyty cymunedol a rhwydwaith o ganolfannau iechyd, clinigau, canolfannau timau iechyd cymunedol ac unedau iechyd meddwl. Mae BIPBC hefyd yn cydlynu neu’n darparu gwaith practisau meddygon teulu a’r gwasanaethau GIG a ddarperir gan ddeintyddion, optegwyr a fferyllwyr ar draws y rhanbarth.

Fel Cyfarwyddwr Gweithredol Gwasanaethau Pobl a Datblygu Sefydliadol (POD), byddwch yn chwarae rhan allweddol o ran llunio dyfodol gweithlu BIPBC a sbarduno newid diwylliannol cadarnhaol ar draws y sefydliad.

Mae'r sefydliad wedi gwneud cynnydd sylweddol o safbwynt gweithredol yn ystod y 12 mis diwethaf dan arweiniad Carol Shillabeer y Prif Weithredwr newydd a'r Tîm Gweithredol ac mae'n dymuno penodi Cyfarwyddwr Gweithredol Gwasanaethau Pobl a Datblygu Sefydliadol i helpu i ysgogi rhagor o welliannau.

Felly mae BIPBC yn dymuno penodi arweinydd Pobl profiadol, blaengar a deinamig i helpu i arwain y Bwrdd Iechyd trwy gamau nesaf y daith drawsnewid. Bydd gennych hanes llwyddiannus o sicrhau newid mewn sefydliadau cymhleth, yn benodol drwy newid diwylliant, byddwch yn frwd dros greu timau a diwylliant cadarnhaol, cynhwysol sy'n perfformio ar lefel uchel.

Os ydych yn barod i ddylanwadu'n sylweddol ar ddyfodol gofal iechyd yng Ngogledd Cymru, yn meddu ar y sgiliau a'r profiad angenrheidiol, trowch at www.odgers.com/91918 i weld rhagor o wybodaeth a chyflwyno cais.

Prif ddyletswyddau'r swydd

Arweinyddiaeth Strategol: Arwain y gwaith o ddatblygu a gweithredu’r agweddau Pobl ar nodau ac amcanion y Bwrdd Iechyd, gan sicrhau ei fod yn gwasanaethu anghenion adrannau clinigol ac anghlinigol ar draws y sefydliad ac yn gweithio mewn partneriaeth â staff a chynrychiolwyr staff.

Datblygu Sefydliadol: Ysgogi mentrau i wella effeithiolrwydd sefydliadol, meithrin diwylliant o arweinyddiaeth dosturiol, gwelliant parhaus, a hyrwyddo ymgysylltiad gweithwyr. Datblygu capasiti a gallu arweinwyr ar bob lefel yn y sefydliad i gynorthwyo i sicrhau perfformiad gwella a sicrhau gweithlu sy'n hyblyg, yn gryf ei gymhelliant ac yn barod i gyfranogi.

Rheoli Doniau: Datblygu strategaethau recriwtio arloesol i ddenu'r bobl fwyaf dawnus, gan sicrhau bod y bobl briodol yn llenwi swyddi allweddol y Bwrdd iechyd. Sicrhau prosesau trylwyr at ddibenion cynllunio ar gyfer olyniaeth er mwyn nodi a datblygu arweinwyr y dyfodol o blith staff y sefydliad.

Lles Gweithwyr: Hyrwyddo blaengareddau ynghylch lles gweithwyr, gan sicrhau y ceir amgylchedd gwaith cefnogol ac iach i bob aelod o'r staff.

Gweithio i'n sefydliad

Bwrdd Iechyd Prifysgol Betsi Cadwaladr (BIPBC) yw’r sefydliad iechyd mwyaf yng Nghymru a chanddo gyllideb o £2.1 biliwn a gweithlu o dros 21,000 o staff. Mae’r Bwrdd Iechyd yn darparu gwasanaethau sylfaenol, eilaidd, cymunedol, iechyd meddwl ac ysbytai acíwt i boblogaeth gogledd Cymru.

Mae BIPBC yn darparu ystod lawn o wasanaethau sylfaenol, cymunedol, iechyd meddwl ac ysbytai acíwt ac arbenigol ar draws 3 ysbyty acíwt, 22 ysbyty cymunedol a rhwydwaith o dros 90 o ganolfannau iechyd, clinigau, canolfannau timau iechyd cymunedol ac unedau iechyd meddwl. Mae BPIBC hefyd yn cydlynu, neu’n darparu gwaith 96 o bractisau meddygon teulu a’r gwasanaeth GIG a ddarperir gan ddeintyddion, optegwyr a fferyllwyr ar hyd a lled y rhanbarth.

Mae’r Bwrdd Iechyd yn system iechyd integredig sy’n ymdrechu i ddarparu gofal tosturiol mewn partneriaeth â’r cyhoedd a sefydliadau statudol a thrydydd sector eraill. Mae BIPBC wedi datblygu perthynas â’r prifysgolion yng ngogledd Cymru ac mae, ynghyd â Phrifysgol Bangor, yn ceisio statws ysgol feddygol ac yn gweithredu mewn diwylliant dysgu sy’n gyfoeth o ymchwil.