HealthJobsUK

Trosolwg o'r swydd

Rydym yn chwilio am weithwyr cyfathrebu proffesiynol sydd am wneud gwahaniaeth trwy eu gwaith a chyfrannu at wella iechyd a lles ein cymunedau.

Mae dwy rôl Uwch Swyddog Cyfathrebu ar gael.

Byddant yn ein cefnogi yn ein huchelgais i symud o wasanaeth sy'n canolbwyntio ar drin salwch, i un sy'n canolbwyntio ar atal afiechyd, neu waethygu afiechyd.

Bydd angen i chi gyflwyno ymgyrchoedd cyfathrebu rhagweithiol ac integredig ar amrywiaeth o faterion iechyd fel rhan o'r rolau hyn. Byddwch hefyd yn helpu i reoli sefyllfaoedd heriol, lle mae cyfathrebu da yn hollbwysig. Gallai hyn amrywio o reoli'r cyfathrebiadau ynghylch risg leol i iechyd y cyhoedd i gefnogi newid yn y modd y darperir gwasanaethau iechyd.

Rydyn ni wir eisiau clywed gan bobl sy'n gallu dangos sut mae eu gwaith cyfathrebu wedi sicrhau canlyniadau cadarnhaol, ac sydd â phrofiad o gefnogi newid ymddygiad.

Os yw hyn yn swnio fel chi, dywedwch wrthym yn eich cais am swydd sut yr ydych yn bodloni'r meini prawf hanfodol. Byddem wrth ein bodd yn clywed am eich profiad a'ch syniadau perthnasol.

Prif ddyletswyddau'r swydd

Mae’r rôl yn gofyn am weithiwr cyfathrebu proffesiynol profiadol sy’n gallu darparu arweinyddiaeth o fewn y tîm cyfathrebu a chynghori uwch reolwyr yn y sefydliad ar eu hymagwedd at gyfathrebu agored, tryloyw a gonest, yn unol â’n Dyletswydd Gonestrwydd.

Byddwch yn defnyddio cyfathrebiadau i ddylanwadu ar newid ymddygiad sydd o fudd i iechyd ein cymunedau. Bydd angen i chi ddarparu gwybodaeth glir a chynnwys creadigol i'n cynulleidfaoedd mewnol ac allanol, gan ddefnyddio dulliau ac ymgyrchoedd cyfathrebu integredig. Gallai hyn gynnwys cyfathrebu ar wella iechyd, mynediad at wasanaethau, newid gwasanaeth, neu mewn digwyddiad mawr, yn unol â'n dyletswyddau Rhybuddio a Hysbysu.

Bydd angen i chi allu dangos profiad o ddefnyddio mecanweithiau amrywiol ar gyfer deialog gyda staff, cleifion, ein cymunedau, a rhanddeiliaid, a bydd angen i chi werthuso hyn i ddangos canlyniadau a dysgu a gwella'n barhaus.

Byddwch yn cyflwyno rhaglen o gynnwys a chyfathrebu sydd hefyd yn cydnabod ac yn dathlu llwyddiannau staff a Bwrdd Iechyd y Brifysgol (BIP), sydd o fudd i'r boblogaeth leol a'r gwasanaeth iechyd ehangach.

Byddwch yn darparu gwasanaeth adweithiol i ymateb yn effeithiol i’r hyn a all fod yn ymholiadau cymhleth a sensitif gan staff, newyddiadurwyr a defnyddwyr cyfryngau cymdeithasol.

Gweithio i'n sefydliad

Bwrdd Iechyd Prifysgol Hywel Dda yw cynllunydd a darparwr gwasanaethau gofal iechyd y GIG i bobl yn Sir Gaerfyrddin, Ceredigion, Sir Benfro a’r siroedd cyfagos. Mae ein 11,000 o staff yn darparu gwasanaethau sylfaenol, cymunedol, mewn ysbytai, iechyd meddwl ac anableddau dysgu ar gyfer tua 384,000 o bobl ar draws chwarter ehangdir Cymru. Gwnawn hyn mewn partneriaeth â’n 3 awdurdod lleol a chydweithwyr yn y sector cyhoeddus, y sector preifat a’r trydydd sector, gan gynnwys ein gwirfoddolwyr, drwy: 

Pedwar prif ysbyty: Ysbyty Cyffredinol Bronglais yn Aberystwyth, Ysbyty Cyffredinol Glangwili yng Nghaerfyrddin, Ysbyty Tywysog Philip yn Llanelli a Ysbyty Cyffredinol Llwynhelyg yn Hwlffordd;
Saith ysbyty cymunedol: Dyffryn Aman a Llanymddyfri yn Sir Gaerfyrddin; Tregaron, Aberaeron ac Aberteifi yng Ngheredigion; a Chanolfan Adnoddau Iechyd a Gofal Cymdeithasol Ysbyty Dinbych-y-pysgod a De Sir Benfro yn Sir Benfro;

48 o bractisau cyffredinol (pedwar ohonynt yn bractisau a reolir), 47 practis deintyddol (gan gynnwys tri orthodontig), 99 o fferyllfeydd cymunedol, 44 o bractisau offthalmig cyffredinol (43 yn darparu Archwiliad Iechyd Llygaid Cymru a 34 o wasanaethau golwg gwan) ac 17 o ddarparwyr gofal cartref yn unig ac 11 canolfannau iechyd;
Lleoliadau niferus yn darparu gwasanaethau iechyd meddwl ac anableddau dysgu;

Gwasanaethau tra arbenigol a thrydyddol a gomisiynir gan Bwyllgor Gwasanaethau Iechyd Arbenigol Cymru, cydbwyllgor sy'n cynrychioli 7 bwrdd iechyd ledled Cymru.