HealthJobsUK

Trosolwg o'r swydd

Mae’r Gwasanaeth Seicoleg Strôc wrth ei fodd o fod yn chwilio am Seicolegydd Clinigol neu Gwnsela i ymuno â’r gwasanaeth Seicoleg newydd yn y Llwybr Strôc. Bydd yr ymgeisydd llwyddiannus yn gweithio yn y llwybrau strôc presennol ledled y Bwrdd Iechyd, gan gefnogi’r timau acíwt a chymunedol amlddisgyblaethol a chefnogi cleifion a theuluoedd y mae strôc yn effeithio arnynt trwy ddarparu dulliau seicolegol uniongyrchol ac anuniongyrchol. 

Bydd y rôl hefyd yn cynnwys darparu cefnogaeth, ymgyngoriadau, addysgu a hyfforddiant i weithwyr iechyd proffesiynol eraill ledled llwybrau strôc. 

Mae’r gwasanaeth hwn yn rhan o Wasanaeth Seicoleg Iechyd Clinigol Hywel Dda, sydd â pherthynas waith agos â’r Gwasanaeth Seicoleg Gofal Critigol a’r Gwasanaeth Niwroseicoleg Rhanbarthol. Mae'r Adran Seicoleg Iechyd Clinigol yn adran gref, ddynamig a llawn cymhelliant. Mae'n ymdrechu i gynnig gofal iechyd o safon uchel sy'n seiliedig ar werth, a bydd yn croesawu'r ymgeisydd llwyddiannus yn ei rôl newydd trwy gyfrwng cymorth cymheiriaid.

Byddem yn croesawu ceisiadau gan bobl sydd â diddordeb mewn gweithio'n llawn-amser neu'n rhan-amser, a bydd yna gyfuniad o weithio'n uniongyrchol gyda chleifion a staff, yn ogystal â threfniadau gweithio o bell. Mae croeso hefyd i seicolegwyr sydd â phrofiad cyfyngedig wneud cais gan y byddwn yn cefnogi'r broses o ddatblygu sgiliau proffesiynol a chlinigol.

Prif ddyletswyddau'r swydd

Mae gan y Bwrdd Iechyd bedair Uned Strôc Acíwt ym mhob Ysbyty Cyffredinol, a gwasanaethau strôc cymunedol sydd wedi’u hintegreiddio â'r Gwasanaeth Adsefydlu Niwrolegol yng Nghaerfyrddin. Mae’r rôl hon yn gyfle cyffrous i weithio ochr yn ochr ag Arweinydd y Gwasanaeth Seicoleg Strôc i ddatblygu modelau gofal seicolegol ledled yr Unedau Strôc Acíwt a’r llwybrau Rhyddhau yn Gynnar â Chymorth, yn unol â chanllawiau arferion gorau. 

Darparu asesiadau seicolegol arbenigol i gleifion y mae strôc yn effeithio arnynt, trwy ddefnyddio offer asesu seicolegol a niwroseicolegol, mesurau hunanadrodd, arsylwadau strwythuredig a chyfweliadau â chleifion, teuluoedd a gweithwyr iechyd proffesiynol eraill. 

Cefnogi gweithwyr proffesiynol amlddisgyblaethol a systemau ehangach sy'n ymwneud â chleifion strôc trwy arweiniad seicolegol, ymgyngoriadau a hyfforddiant. 

Darparu fformwleiddiadau a chynlluniau triniaeth sy'n canolbwyntio ar yr unigolyn ac yn seiliedig ar dystiolaeth i gefnogi'r gwaith o reoli anawsterau seicolegol,niwroseicolegol ac iechyd meddwl 
cleifion. 

Darparu dulliau gweithredu, cyngor ac ymgyngoriadau seiliedig ar seicoleg i gyd-weithwyr amlddisgyblaethol ar draws amrywiol lwybrau a lleoliadau strôc. 

Cynorthwyo Arweinydd y Gwasanaeth Seicoleg Strôc i fodloni'r agweddau seicolegol ar y Canllawiau Clinigol Cenedlaethol ar gyfer Strôc a Chynllun Cyflawni ar gyfer Strôc Llywodraeth Cymru.

Gweithio i'n sefydliad

Bwrdd Iechyd Prifysgol Hywel Dda yw cynllunydd a darparwr gwasanaethau gofal iechyd y GIG i bobl yn Sir Gaerfyrddin, Ceredigion, Sir Benfro a’r siroedd cyfagos. Mae ein 12,000 o staff yn darparu gwasanaethau sylfaenol, cymunedol, mewn ysbytai, iechyd meddwl ac anableddau dysgu ar gyfer tua 384,000 o bobl ar draws chwarter ehangdir Cymru. Gwnawn hyn mewn partneriaeth a’n 3 awdurdod lleol a chydweithwyr yn y sector cyhoeddus, y sector preifat a’r trydydd sector, gan gynnwys ein gwirfoddolwyr, drwy:

Pedwar prif ysbyty: Ysbyty Cyffredinol Bronglais yn Aberystwyth, Ysbyty Cyffredinol Glangwili yng Nghaerfyrddin, Ysbyty Tywysog Philip yn Llanelli a Ysbyty Cyffredinol Llwynhelyg yn Hwlffordd;

Saith ysbyty cymunedol: Dyffryn Aman a Llanymddyfri yn Sir Gaerfyrddin; Tregaron, Aberaeron ac Aberteifi yng Ngheredigion; a Chanolfan Adnoddau Iechyd a Gofal Cymdeithasol Ysbyty Dinbych-y-pysgod a De Sir Benfro yn Sir Benfro;

48 o bractisau cyffredinol (chwech ohonynt yn bractisau a reolir), 47 practis deintyddol (gan gynnwys tri orthodontig), 99 o fferyllfeydd cymunedol, 44 o bractisau offthalmig cyffredinol (43 yn darparu Archwiliad Iechyd Llygaid Cymru a 34 o wasanaethau golwg gwan) ac 17 o ddarparwyr gofal cartref yn unig ac 11 canolfannau iechyd;

Lleoliadau niferus yn darparu gwasanaethau iechyd meddwl ac anableddau dysgu;

Gwasanaethau tra arbenigol a thrydyddol a gomisiynir gan Bwyllgor Gwasanaethau Iechyd Arbenigol Cymru, cydbwyllgor sy'n cynrychioli 7 bwrdd iechyd ledled Cymru.