HealthJobsUK

Trosolwg o'r swydd

Mae cyfle wedi dod ar gael i Nyrs Ardal â chymwysterau a phrofiad addas wneud cais am  rôl heriol yr Arweinydd Tîm ar gyfer Nyrsys Ardal.

Rhaid i unrhyw ymgeisydd fod yn Nyrs Gofrestredig â chymhwyster y Dyfarniad Ymarfer Arbenigol mewn Nyrsio Ardal (ôl-raddedig). Hefyd, rhaid i'r ymgeiswyr naill ai feddu ar  gymhwyster Meistr perthnasol neu fod yn barod i fynd ar drywydd y cymhwyster hwnnw.  Bydd yr ymgeisydd llwyddiannus yn rheoli ac yn arwain tîm prysur iawn o Nyrsys Ardal,  gan sicrhau bod gofal y Tîm Nyrsys Ardal yn cael ei ddarparu mewn modd di-dor a diogel i  lwyth achosion mawr o gleifion acíwt a chleifion â salwch cronig, a hynny saith niwrnod yr  wythnos. Mae yna ofyniad sylfaenol am ymagwedd hynod o hyblyg a brwdfrydig at y rôl  heriol hon, ynghyd â'r gallu i deithio rhwng safleoedd mewn modd amserol.

Ar y dechrau, bydd y swydd yn cael ei lleoli gyda Thîm Nyrsys Ardal Lôn Winch yn  Hwlffordd, er y gallai fod yn ofynnol i ddeiliad y swydd weithio ledled Gogledd a De Sir  Benfro i ddiwallu anghenion y Gwasanaeth.

Mae'r gallu i siarad Cymraeg yn ddymunol ar gyfer y swydd hon; mae croeso i siaradwyr  Cymraeg a/neu Saesneg, fel ei gilydd, wneud cais.

Prif ddyletswyddau'r swydd

Amlygu gwerthoedd y Bwrdd Iechyd, sef urddas, parch, tegwch, uniondeb, gonestrwydd, caredigrwydd a thosturi, gan fod yn agored ac yn ofalus, ym mhob peth a wnewch yn yr  amgylchedd gwaith, a sicrhau bod eraill yn amlygu'r un gwerthoedd.

Arddel atebolrwydd o ddydd i ddydd am reoli llwyth gwaith y Nyrsys Ardal, gan gynnwys  arwain a datblygu'r sefydliad nyrsio craidd wrth ddarparu gofal nyrsio tosturiol, effeithiol,  o'r radd flaenaf, sy'n canolbwyntio ar y claf; a rheoli pobl mewn modd teg, gonest ac  ystyriol.

Darparu arweinyddiaeth, cymorth, goruchwyliaeth ac arweiniad nyrsio gweladwy a phroffesiynol (yn unol â safonau'r Cyngor Nyrsio a Bydwreigiaeth), ynghyd â chyngor clinigol/ymyriadau ar faterion cymhleth arbenigol yn eich maes, ac ymgymryd â  gweithgareddau rheoli a monitro yn unol â gofynion cyfreithiol a phroffesiynol, rheolau  statudol a pholisïau'r Bwrdd Iechyd sy'n ymwneud ag ymarfer seiliedig ar dystiolaeth.

Bod yn gyfrifol am reoli'r gyllideb a ddyrennir mewn modd effeithlon, gan ddefnyddio'r  tîm nyrsio mewn modd effeithiol, defnyddio'r adnoddau a ddyrennir, a chodi unrhyw  bryderon ynghylch gwariant i'r personél priodol mewn modd amserol.

Sicrhau yr eir i'r afael ag anghenion cymhleth cleifion â phatholegau lluosog, ynghyd ag  anghenion eu teuluoedd, a hynny mewn modd sensitif ac empathig. Bydd hyn yn cynnwys  cefnogi'r broses o asesu, gweithredu ac ailwerthuso pecynnau gofal iechyd parhaus.

Cynhelir y cyfweliadau ar  06/08/24

Gweithio i'n sefydliad

Bwrdd Iechyd Prifysgol Hywel Dda yw cynllunydd a darparwr gwasanaethau gofal iechyd y GIG i bobl yn Sir Gaerfyrddin, Ceredigion, Sir Benfro a’r siroedd cyfagos. Mae ein 12,000 o staff yn darparu gwasanaethau sylfaenol, cymunedol, mewn ysbytai, iechyd meddwl ac anableddau dysgu ar gyfer tua 384,000 o bobl ar draws chwarter ehangdir Cymru. Gwnawn hyn mewn partneriaeth a’n 3 awdurdod lleol a chydweithwyr yn y sector cyhoeddus, y sector preifat a’r trydydd sector, gan gynnwys ein gwirfoddolwyr, drwy:

Pedwar prif ysbyty: Ysbyty Cyffredinol Bronglais yn Aberystwyth, Ysbyty Cyffredinol Glangwili yng Nghaerfyrddin, Ysbyty Tywysog Philip yn Llanelli a Ysbyty Cyffredinol Llwynhelyg yn Hwlffordd;

Saith ysbyty cymunedol: Dyffryn Aman a Llanymddyfri yn Sir Gaerfyrddin; Tregaron, Aberaeron ac Aberteifi yng Ngheredigion; a Chanolfan Adnoddau Iechyd a Gofal Cymdeithasol Ysbyty Dinbych-y-pysgod a De Sir Benfro yn Sir Benfro;

48 o bractisau cyffredinol (chwech ohonynt yn bractisau a reolir), 47 practis deintyddol (gan gynnwys tri orthodontig), 99 o fferyllfeydd cymunedol, 44 o bractisau offthalmig cyffredinol (43 yn darparu Archwiliad Iechyd Llygaid Cymru a 34 o wasanaethau golwg gwan) ac 17 o ddarparwyr gofal cartref yn unig ac 11 canolfannau iechyd;

Lleoliadau niferus yn darparu gwasanaethau iechyd meddwl ac anableddau dysgu;

Gwasanaethau tra arbenigol a thrydyddol a gomisiynir gan Bwyllgor Gwasanaethau Iechyd Arbenigol Cymru, cydbwyllgor sy'n cynrychioli 7 bwrdd iechyd ledled Cymru.