HealthJobsUK

Trosolwg o'r swydd

Mae'r tîm ffisiotherapi cyhyrysgerbydol yn cynnig y cyfle ar gyfer swydd ffisiotherapydd band 6 parhaol llawn-amser. 

Mae'r gwasanaeth yn gweithredu ar draws Bwrdd Iechyd y Brifysgol, gan gynnwys y tair sir, sef Sir Benfro, Ceredigion a Sir Gaerfyrddin. Bydd deiliad y swydd wedi'i leoli  naill ai yn Hafan Derwen, Caerfyrddin, Ysbyty'r Tywysog Philip, Llanelli, neu Ysbyty Cyffredinol Llwynhelyg, Hwlffordd.

Mae'r gwasanaeth cyhyrysgerbydol yn cynnig hydrotherapi, sydd wedi'i leoli ar hyn o bryd yn Ysbyty Glangwili yng Nghaerfyrddin, dosbarthiadau ymarfer corff yn y gampfa, ac mae hefyd yn darparu’r rhaglen Escape ar gyfer rheoli cleifion ag Osteoarthritis yn y glun a'r pen-glin. Rydym yn gweithio’n agos gyda’r Cynllun Cenedlaethol i Atgyfeirio Cleifion i Wneud Ymarfer Corff, ac yn ceisio datblygu cysylltiadau â darparwyr gweithgareddau yn y trydydd sector er mwyn cynnig rhagor o gymorth i’n defnyddwyr gwasanaethau ar ôl eu cwrs adsefydlu.

Prif ddyletswyddau'r swydd

Yn unol â'i faes clinigol arbenigol diffiniedig, bydd deiliad y swydd yn rhan o dîm presennol o ffisiotherapyddion sy'n gyfrifol am ddarparu gwasanaethau adsefydlu cleifion ym Mwrdd Iechyd Prifysgol Hywel Dda. Bydd hyn yn golygu gweithio ar y cyd â thimau rhyngddisgyblaethol ac amlddisgyblaethol i ddarparu gofal holistaidd.

Bydd deiliad y swydd yn gyfrifol am reoli ei lwyth achosion ei hun, a fydd yn cynnwys hunanatgyfeiriadau, yn ogystal ag atgyfeiriadau gan feddygon teulu, gweithwyr proffesiynol perthynol i iechyd, ymarferwyr y gwasanaethau cymdeithasol a meddygon ymgynghorol. Bydd yn weithiwr proffesiynol annibynnol sydd â lefel uchel o sgiliau ac arbenigedd clinigol a thechnegol, ac sy'n defnyddio sylfaen dystiolaeth i gynllunio, gweithredu a gwerthuso'r broses o reoli cleientiaid.

Bydd deiliad y swydd yn cymryd rhan yn y broses datblygiad proffesiynol parhaus, gan gynnwys addysgu/goruchwylio staff iau a myfyrwyr.

Bydd deiliad y swydd yn chwarae rhan allweddol wrth gefnogi'r broses o foderneiddio a datblygu'r gwasanaeth. Bydd hyn yn cynnwys cymryd rhan ym mhrosesau archwilio a gwerthuso y gwasanaeth.

Bydd yn ofynnol i ddeiliad y swydd gymryd rhan yn y gwaith o ddarparu gwasanaeth hyblyg saith niwrnod, yn seiliedig ar anghenion y gwasanaeth. Bydd hyn yn ôl trefn rota. Bydd gofyn i ddeiliad y swydd gyfrannu at ddarparu'r gwasanaeth anadlol ar alwad. 

Gweithio i'n sefydliad

Bwrdd Iechyd Prifysgol Hywel Dda yw cynllunydd a darparwr gwasanaethau gofal iechyd y GIG i bobl yn Sir Gaerfyrddin, Ceredigion, Sir Benfro a’r siroedd cyfagos. Mae ein 11,000 o staff yn darparu gwasanaethau sylfaenol, cymunedol, mewn ysbytai, iechyd meddwl ac anableddau dysgu ar gyfer tua 384,000 o bobl ar draws chwarter ehangdir Cymru. Gwnawn hyn mewn partneriaeth a’n 3 awdurdod lleol a chydweithwyr yn y sector cyhoeddus, y sector preifat a’r trydydd sector, gan gynnwys ein gwirfoddolwyr, drwy:

Pedwar prif ysbyty: Ysbyty Cyffredinol Bronglais yn Aberystwyth, Ysbyty Cyffredinol Glangwili yng Nghaerfyrddin, Ysbyty Tywysog Philip yn Llanelli a Ysbyty Cyffredinol Llwynhelyg yn Hwlffordd;

Saith ysbyty cymunedol: Dyffryn Aman a Llanymddyfri yn Sir Gaerfyrddin; Tregaron, Aberaeron ac Aberteifi yng Ngheredigion; a Chanolfan Adnoddau Iechyd a Gofal Cymdeithasol Ysbyty Dinbych-y-pysgod a De Sir Benfro yn Sir Benfro;

48 o bractisau cyffredinol (chwech ohonynt yn bractisau a reolir), 47 practis deintyddol (gan gynnwys tri orthodontig), 99 o fferyllfeydd cymunedol, 44 o bractisau offthalmig cyffredinol (43 yn darparu Archwiliad Iechyd Llygaid Cymru a 34 o wasanaethau golwg gwan) ac 17 o ddarparwyr gofal cartref yn unig ac 11 canolfannau iechyd;

Lleoliadau niferus yn darparu gwasanaethau iechyd meddwl ac anableddau dysgu;

Gwasanaethau tra arbenigol a thrydyddol a gomisiynir gan Bwyllgor Gwasanaethau Iechyd Arbenigol Cymru, cydbwyllgor sy'n cynrychioli 7 bwrdd iechyd ledled Cymru.