HealthJobsUK

Trosolwg o'r swydd

Mae cyfle ar gael ar gyfer Peiriannydd Arweiniol Gwasanaethau’r Golchdy Band 6 wedi'i leoli yng Ngolchdy Green Vale

Bydd y rôl yn cynnwys bod yn rheolwr llinell yr adran cynnal a chadw o ddydd i ddydd, cydlynu’r ystod lawn o weithgareddau cynnal a chadw ar y safle megis rhedeg y system Cynnal a Chadw Ataliol Cynlluniedig (PPM) o ddydd i ddydd, trefnu gosodiadau, cynnal a chadw stoc, archebu darnau sbâr, rheoli contractwyr ar y safle

Bydd y dyletswyddau'n cynnwys rheoli staff ac adnoddau o fewn yr adran a ddyrannwyd iddynt i gyflawni'r perfformiad gorau posibl yn unol â gofynion rheoli a gwasanaethau cydlynu’r Golchdy gyda'r Rheolwr a Dirprwy Reolwr y Golchdy

Bydd deiliad y swydd yn cymryd cyfrifoldeb am fonitro ansawdd y gwaith a gynhyrchir yn yr adran. Bydd hefyd yn allweddol wrth gymell staff ac wrth nodi a darparu cymorth ar gyfer hyfforddi a datblygu staff peirianneg. Bydd deiliad y swydd yn arwain safonau Iechyd a Diogelwch ar y safle

Yr oriau gweithio cychwynnol ar gyfer y rôl hon fyddai dydd Llun i ddydd Gwener, rhwng 7.30 a 15.30. Fodd bynnag, bydd yr oriau gwaith yn seiliedig ar anghenion y gwasanaeth a gallent gynnwys gweithio rhwng y ddau batrwm sifft presennol a chyflenwi ar gyfer gwyliau ac absenoldebau salwch aelodau eraill o’r adran.  Mae hyn yn cynnwys gweithio penwythnosau yn ogystal â gweithio diwrnodau 12 awr.  

Prif ddyletswyddau'r swydd

Rhaid bod y Peiriannydd Arweiniol wedi cyflawni prentisiaeth gydnabyddedig mewn disgyblaeth fecanyddol neu drydanol ac wedi cwblhau cwrs tystysgrif crefft City & Guilds perthnasol. Rhaid i’r Peiriannydd Arweiniol feddu ar wybodaeth gadarn o egwyddorion ac arferion masnach hefyd.

Rhaid ei fod wedi ennill dealltwriaeth drylwyr o systemau cynnal a chadw Peirianneg a rhaid bod ganddo profiad sylweddol. Rhaid iddo allu dangos ei fod yn hyblyg iawn a’i fod wedi sicrhau bod ganddo’r wybodaeth dechnegol gyfredol sy'n gysylltiedig ag amgylchedd gofal iechyd.

Darparu gwybodaeth dechnegol a chynghori grwpiau eraill o staff am faterion cynnal a chadw a allai gael effaith ar gyflenwi gwasanaethau.

Rheoli, cynllunio a blaenoriaethu gweithgareddau cynnal a chadw neu fân waith o ddydd i ddydd ac yn y tymor hir a sicrhau y dyrennir digon o waith i’r gweithlu ar bob adeg.

Meddu ar y sgiliau TG angenrheidiol i fewnbynnu a thrin data sy'n gysylltiedig â'r system rheoli cynnal a chadw Rheng Flaen a’r system gaffael electronig.

Mae'r gallu i siarad Cymraeg yn ddymunol ar gyfer y swydd hon; mae croeso cynnes i siaradwyr Cymraeg a/neu Saesneg fel ei gilydd wneud cais.

Gweithio i'n sefydliad

Ym Mhartneriaeth Cydwasanaethau GIG Cymru (PCGC) rydym yn disgwyl i bawb arddel ein gwerthoedd sef: Gwrando a Dysgu, Cydweithio, Cymryd Cyfrifoldeb ac Arloesi.

Mae ein sefydliad yn annog dull gweithio ystwyth ac rydym yn ymfalchïo mewn bod yn sefydliad sy'n dysgu ac sy’n cael ei ysgogi gan welliant parhaus.

Rydym wedi ymrwymo i greu gweithle cynhwysol sy’n gwerthfawrogi cydraddoldeb, amrywiaeth a chynhwysiant, gan ganolbwyntio ar lesiant a pherthyn i’n pobl. 

Mae gwasanaeth cwsmeriaid rhagorol yn rhywbeth yr ydym yn ymgyrraedd ato, ar gyfer ein cwsmeriaid mewnol ac allanol.

Rydym yn cynnig pecyn buddion cynhwysfawr, gyda rhywbeth i bawb.  I gael gwybod mwy am weithio i ni, y buddion rydym yn eu cynnig a chanllawiau ar y broses ymgeisio ewch i https://pcgc.gig.cymru/gweithio-i-ni/

Mae PCGC yn gweithio mewn ffordd ystwyth lle bo modd. Bydd gan bob swydd ganolfan weithio gontractiol, ond fel rhan o ffyrdd ystwyth o weithio gallai hynny olygu gweithio gartref ac mewn lleoliadau eraill. Rydym hefyd yn edrych ar sut rydym yn cydbwyso hyblygrwydd gyda chymuned, a sut i reoli cyfleoedd i ddysgu oddi wrth ein gilydd.