HealthJobsUK

Trosolwg o'r swydd

Gweithiwr Cymorth Gofal Iechyd – Graddiwr Sgriniwr

Mae Sgrinio Llygaid Diabetig Cymru (DESW) yn sefydlu tîm rhanbarthol newydd yn y Drenewydd, Powys.

Rydym yn chwilio am bedwar unigolyn brwdfrydig ac ymrwymedig i ymuno â'n tîm a hyfforddi fel graddwyr sgrinwyr retinol.

Mae'r rôl hon yn gyfle gwych i'r rhai sy'n barod i gymryd y cam nesaf yn eu gyrfa.  Nid oes angen profiad ym maes sgrinio na graddio retinol, oherwydd darperir hyfforddiant a chymorth llawn i gael y cymwysterau angenrheidiol. 

Os ydych yn…

·       Brofiadol mewn rôl sy'n wynebu cleifion neu gwsmeriaid mewn lleoliad Iechyd neu Ofal Cymdeithasol,

·       Angerddol am ddarparu gofal o ansawdd uchel, sy'n canolbwyntio ar gleifion,

·       Ymroddedig i wella gwasanaethau yn barhaus,

·       Ymrwymedig i ennill Diploma sgrinio retinol,

…ac yn meddu ar drwydded yrru lawn y DU, byddem wrth ein bodd yn clywed gennych!

Ynglŷn â DESW

Mae ein gwasanaethau'n darparu sgrinio i ganfod arwyddion cynnar o retinopathi diabetig, un o gymhlethdodau diabetes sy'n gallu arwain at golli golwg neu ddallineb os na chaiff ei drin.  Mae'r broses sgrinio yn cynnwys cymryd delweddau digidol o ansawdd uchel o'r retina (yr haen sensitif i olau ar gefn y llygad) i nodi unrhyw niwed i'r pibellau gwaed bach a achosir gan ddiabetes.

I ddysgu rhagor am y gwaith rydym yn ei wneud, ewch i Sgrinio Llygaid Diabetig Cymru - Iechyd Cyhoeddus Cymru

Prif ddyletswyddau'r swydd

Mae'r rôl yn cynnwys cylchdroi rhwng sgrinio a graddio retinol, gan ganolbwyntio'n bennaf ar sgrinio.

Cyfrifoldebau Allweddol:

• Arwain cyfranogwyr drwy apwyntiadau sgrinio, gan sicrhau bod cofnodion cywir yn cael eu cadw.
• Gweinyddu diferion llygaid a gwirio ymlediad cannwyll y llygad yn gywir o fewn amserlenni penodol.
• Cofnodi delweddau digidol o ansawdd uchel o'r retina gan ddefnyddio camerâu arbenigol.
• Darparu graddio sylfaenol ac eilaidd i nodi nodweddion risg retinopathi diabetig.
• Dilyn protocolau a threfniadau gweithredu safonol DESW yn llym.

Gyrru Cerbyd Nwyddau Ysgafn yr Ymddiriedolaeth i glinigau ar draws Powys yn bennaf ac o bryd i'w gilydd i ranbarthau eraill yng Nghymru.  

Gweithio i'n sefydliad

Ni yw Iechyd Cyhoeddus Cymru - asiantaeth iechyd cyhoeddus genedlaethol Cymru. Ein diben yw ‘gweithio gyda'n gilydd ar gyfer Cymru iachach'. Rydym yn bodoli i helpu pawb yng Nghymru i fyw bywydau hirach, iachach. Gyda'n partneriaid, ein nod yw cynyddu disgwyliad oes iach, gwella iechyd a llesiant, a lleihau anghydraddoldebau i bawb yng Nghymru, nawr ac ar gyfer cenedlaethau'r dyfodol. 

Gyda'i gilydd, mae ein timau'n gweithio i atal clefyd, diogelu iechyd, a darparu arweinyddiaeth, gwasanaethau arbenigol ac arbenigedd iechyd cyhoeddus. Ni yw'r brif ffynhonnell o wybodaeth, ymchwil ac arloesedd iechyd cyhoeddus yng Nghymru. Nid yw iechyd cyhoeddus erioed wedi bod mor bwysig wrth i ni ddod drwy bandemig y Coronafeirws, wynebu heriau'r argyfwng costau byw a mynd i'r afael ac atal effeithiau niweidiol newid hinsawdd.

Caiff ein sefydliad ei arwain gan ein gwerthoedd 'Cydweithio, gydag ymddiriedaeth a pharch, i wneud gwahaniaeth'. Rydym wedi ymrwymo i greu gweithle cynhwysol sy'n rhoi gwerth ar gydraddoldeb, amrywiaeth a chynhwysiant.  Rydym yn croesawu ceisiadau sy'n cynrychioli amrywiaeth gyfoethog y cymunedau rydym yn eu gwasanaethu a chan y rhai sy'n dymuno gweithio'n rhan amser neu rannu swydd.

I ddarganfod mwy am weithio i ni a'r buddion rydym yn eu cynnig, ewch i Gyrfaoedd - Iechyd Cyhoeddus Cymru (gig.cymru)

I gael arweiniad ar y broses ymgeisio, ewch i Gwybodaeth a Chanllawiau i Ymgeiswyr - Iechyd Cyhoeddus Cymru (gig.cymru)