HealthJobsUK

Trosolwg o'r swydd

Mae’r cyfle unigryw hwn yn un o ddau benodiad newydd yn Iechyd a Gofal Digidol Cymru i weithio gyda’n sefydliadau partner i gefnogi’r agenda ddigidol yng Nghymru. Rydym yn chwilio am arweinydd clinigol angerddol a phrofiadol sy’n dal cofrestriad HCPC cyfredol i ymuno â’n Tîm Gwybodeg Glinigol. Bydd deiliad y swydd yn gweithio ochr yn ochr â’n Prif Swyddog Gwybodaeth Proffesiynau Perthynol i Iechyd (AHP) newydd i ddarparu arweinyddiaeth ar y cyd â CCIOs, CNIOs ac arweinwyr digidol, i sicrhau ymagwedd Cymru gyfan, gyda’n partneriaid, at drawsnewid digidol ledled Cymru.

Mewn cydweithrediad â’n partneriaid, bydd deiliad y swydd yn darparu arweinyddiaeth gwybodeg glinigol i hwyluso’r gwaith o ddarganfod, datblygu, mabwysiadu a gwella’r modd y caiff newidiadau digidol eu galluogi ar draws GIG Cymru. Gyda dealltwriaeth o’r heriau presennol ar draws y maes iechyd a lles ehangach, modelau darparu gofal, sefydliadau a’r llywodraethu cysylltiedig ar draws y llwybr gofal, gan gynnwys eu cydberthnasau a sut maen nhw’n dylanwadu ar gyflawni prosiectau/rhaglenni gwybodeg.

Mae gweithio mewn partneriaeth ag amrywiaeth o randdeiliaid yn hanfodol i sicrhau ein bod yn deall, yn gwrando ac yn ymateb i anghenion. Rydym yn gweithio ar y cyd â byrddau iechyd ac ymddiriedolaethau, cyrff cyhoeddus, Llywodraeth Cymru, gwasanaethau gofal cymdeithasol a chymunedol, y byd academaidd, diwydiant a’r cyhoedd.

Prif ddyletswyddau'r swydd

Prif ddyletswyddau’r rôl hon yw gweithio ar y cyd â’n partneriaid i:

• Fod yn atebol am ddarparu arweinyddiaeth broffesiynol i alluogi pensaernïaeth glinigol/meddyginiaethau digidol diogel ac effeithiol trwy ddylunio ac optimeiddio systemau gwybodaeth glinigol o fewn sefydliadau gofal iechyd.
• Defnyddio safonau gwybodeg a phrosesau sicrhau ansawdd Iechyd a Gofal Digidol Cymru (IGDC) i lywio dadansoddiadau busnes a chlinigol proffesiynol o gymwysiadau clinigol a/neu brosiectau i wasanaethau iechyd a gofal, cynllunio gwasanaethau a systemau, prosesau, gwelliannau, a buddion clinigol.
• Defnyddio gwybodaeth glinigol a phrofiad o gysyniadau, dulliau ac offer gwybodeg i gefnogi’r gwaith o ddarganfod, datblygu a mabwysiadu platfformau a datrysiadau clinigol sy’n hybu gofal cleifion a phoblogaeth sy’n cyd-fynd â Pharthau Ansawdd Safonau Iechyd a Gofal.

Gweithio i'n sefydliad

Mae Iechyd a Gofal Digidol Cymru (DHCW) yn rhan o deulu GIG Cymru ac mae ganddo rôl bwysig wrth newid y ffordd y darperir gwasanaethau iechyd a gofal trwy dechnoleg a data. Mae’r sefydliad yn cefnogi staff rheng flaen gyda systemau modern a mynediad at wybodaeth bwysig am eu cleifion, wrth rymuso pobl Cymru i reoli eu hiechyd eu hunain trwy wasanaethau digidol GIG Cymru.

Mae gweithio i DHCW yn cynnig llawer o fuddion i weithwyr, gan gynnwys gweithio hyblyg, cyflog cystadleuol, 28 diwrnod o wyliau blynyddol yn ogystal â gwyliau banc a chyfleoedd i ddatblygu gyrfa. Rydym wedi ymrwymo i gydnabod a dathlu ein staff fel y rhan fwyaf gwerthfawr o’n sefydliad.

Ymunwch â'n tîm trawsnewidiol sy’n achub bywydau a dechrau gwneud gwahaniaeth go iawn i wasanaethau iechyd a gofal yng Nghymru.