HealthJobsUK

Trosolwg o'r swydd

Mae cyfle wedi codi i Arweinydd Clinigol Genomeg ymuno â Rhwydwaith Clinigol Strategol Cenedlaethol ar gyfer Canser, sy'n rhan o Weithrediaeth GIG Cymru, a gynhelir gan Iechyd Cyhoeddus Cymru. Mae Rhwydwaith Canser Cymru yn dod â gweithwyr proffesiynol meddygol, clinigol a phrosiect ynghyd mewn tîm cefnogol a deinamig. Mae ein rhaglenni yn cael eu hysgogi gan wybodaeth glinigol, profiad cleifion, ymchwil a thrwy gofleidio technolegau a datblygiadau newydd ym maes gofal canser.

Rydym yn chwilio am Arweinydd Clinigol Genomeg i ymuno â’r tîm presennol, i weithio ar y cyd, gan ddarparu gwybodaeth ac arweinyddiaeth arbenigol, gan gefnogi dull Cymru gyfan. Mae'r swydd hon yn cynnwys dwy sesiwn glinigol yr wythnos. Byddai angen i'r ymgeisydd llwyddiannus fod yn gweithio ar lefel ymgynghorydd, i ymgymryd â'r swydd heriol hon, a fydd yn darparu arweinyddiaeth glinigol, cyfeiriad strategol ac arbenigedd ar gyfer y Rhaglen Trin Canser. Bydd yn gweithredu fel adnodd a chynghorydd proffesiynol, i ddarparu cymorth ac arweiniad ar bob mater sy’n ymwneud â genomeg canser, a bydd yn arwain ar ystod o brosiectau ac amcanion i ddatblygu a gwella canllawiau a phrosesau cenedlaethol, profiad y claf, a chryfhau cydweithio â chydweithwyr sy’n gweithio ledled Cymru.

Bydd angen i'r ymgeisydd/ymgeiswyr llwyddiannus ddangos sgiliau cyfathrebu, rhyngbersonol ac ysgogol cryf gan fod cyflawni'r gwaith hwn yng Nghymru yn llwyddiannus yn dibynnu ar gydweithio a'r gallu i ddatblygu perthnasoedd cryf. 

Prif ddyletswyddau'r swydd

Bydd deiliad y swydd yn:

·         Meddu ar sgiliau arweinyddiaeth glinigol cryf, gan roi cyfeiriad a throsolwg i'r rhwydwaith a meithrin diwylliant o ymgysylltu clinigol.

·         Meithrin perthnasoedd gwaith cryf gyda JCC, AWMGS, Llywodraeth Cymru, rhaglenni delweddu cenedlaethol, rhaglenni patholeg cenedlaethol, grwpiau safleoedd canser a staff clinigol Byrddau / Ymddiriedolaethau Iechyd sy'n gweithio mewn gwasanaethau genetig sy’n benodol i oncoleg yng Nghymru.

·         Mynd ati i weithio gyda chydweithwyr clinigol a chyrff cynrychioliadol ledled Cymru i hyrwyddo blaenoriaethau a rhaglen waith y Rhwydwaith Canser.

·         Sicrhau bod ymgysylltiad clinigol priodol o fewn y maes portffolio drwy hyrwyddo manteision ymgysylltu clinigol gan gydweithwyr wrth ail-ddylunio a thrawsnewid gwasanaethau.

·         Cymryd rhan weithredol mewn cyfleoedd cydweithredol, yn genedlaethol ac yn rhyngwladol, i gasglu gwybodaeth a mewnwelediad i lywio arloesedd i ategu blaenoriaethau lleol a chenedlaethol.

·         Cyfrannu at weithdai a digwyddiadau cenedlaethol gyda rhanddeiliaid allweddol eraill, a’u harwain, lle y bo’n bosibl, i gynyddu ymgysylltiad a hyrwyddo rhwydweithio.

·         Meithrin perthnasoedd gwaith rhagorol gyda chlinigwyr, timau rheoli byrddau ac ymddiriedolaethau iechyd, academyddion, darpar gomisiynwyr a sefydliadau trydydd sector.

Gweithio i'n sefydliad

Ni yw Iechyd Cyhoeddus Cymru - asiantaeth iechyd cyhoeddus genedlaethol Cymru. Ein diben yw ‘gweithio gyda'n gilydd ar gyfer Cymru iachach'. Rydym yn bodoli i helpu pawb yng Nghymru i fyw bywydau hirach, iachach. Gyda'n partneriaid, ein nod yw cynyddu disgwyliad oes iach, gwella iechyd a llesiant, a lleihau anghydraddoldebau i bawb yng Nghymru, nawr ac ar gyfer cenedlaethau'r dyfodol. 

Gyda'i gilydd, mae ein timau'n gweithio i atal clefyd, diogelu iechyd, a darparu arweinyddiaeth, gwasanaethau arbenigol ac arbenigedd iechyd cyhoeddus. Ni yw'r brif ffynhonnell o wybodaeth, ymchwil ac arloesedd iechyd cyhoeddus yng Nghymru. Nid yw iechyd cyhoeddus erioed wedi bod mor bwysig wrth i ni ddod drwy bandemig y Coronafeirws, wynebu heriau'r argyfwng costau byw a mynd i'r afael ac atal effeithiau niweidiol newid hinsawdd.

Caiff ein sefydliad ei arwain gan ein gwerthoedd 'Cydweithio, gydag ymddiriedaeth a pharch, i wneud gwahaniaeth'. Rydym wedi ymrwymo i greu gweithle cynhwysol sy'n rhoi gwerth ar gydraddoldeb, amrywiaeth a chynhwysiant.  Rydym yn croesawu ceisiadau sy'n cynrychioli amrywiaeth gyfoethog y cymunedau rydym yn eu gwasanaethu a chan y rhai sy'n dymuno gweithio'n rhan amser neu rannu swydd.

I ddarganfod mwy am weithio i ni a'r buddion rydym yn eu cynnig, ewch i Gyrfaoedd - Iechyd Cyhoeddus Cymru (gig.cymru)

I gael arweiniad ar y broses ymgeisio, ewch i Gwybodaeth a Chanllawiau i Ymgeiswyr - Iechyd Cyhoeddus Cymru (gig.cymru)