HealthJobsUK

Trosolwg o'r swydd

Mae gennym gyfle cyffrous yn Adran Cyllid a Pherfformiad y Gyfarwyddiaeth Gweithrediadau a Chyllid. Mae ein tîm wedi ymrwymo i fyw gwerthoedd Iechyd Cyhoeddus Cymru ac yn falch o'r gwaith a wnawn.

Os ydych chi'n frwdfrydig am ddyfodol ym myd cyllid a pherfformiad yna gallai'r rôl gyffrous hon fod yn addas i chi.  Byddem yn croesawu galwad i drafod unrhyw ymholiadau sydd gennych a gallwn drefnu i chi ymweld a chwrdd â'r tîm os byddai'n helpu gyda'ch penderfyniad ar wneud cais.

Y cyfle presennol sydd ar gael Partner Busnes Cyllid

Rydym yn ymdrechu i gyflawni gwaith i safon eithriadol o uchel a thynnu ar arferion gorau ac arloesedd.  Rydym yn ceisio creu diwylliant bywiog, cynhwysol ac iach lle mae ein tîm yn cael eu cefnogi i ddatblygu a ffynnu.  Rydym wedi ymrwymo i greu a meithrin amgylchedd gwaith cadarnhaol, hyblyg a chynaliadwy.

Mae'r rôl hon yn cynnwys Gweithio Ystwyth ac mae’r swyddfa yn Rhif 2 Capital Quarter yng Nghaerdydd.  Efallai y bydd angen teithio i safleoedd eraill Iechyd Cyhoeddus Cymru o bryd i’w gilydd hefyd. 

Prif ddyletswyddau'r swydd

Bydd y Partner Busnes Cyllid yn cefnogi'r Uwch Bartner Busnes Cyllid i sicrhau rheolaeth ariannol ragweithiol a rheolaeth ariannol ar adnoddau meysydd gwasanaeth ar bob lefel benderfynu a defnyddio’r adnoddau hyn yn effeithiol i gyflawni gwerth am arian.

Gan gefnogi Uwch Dîm Rheoli'r Gyfarwyddiaeth, mae deiliad y swydd yn gyfrifol am gynllunio ariannol tymor byr a thymor hir, gan sicrhau bod nodau ac amcanion y gyfarwyddiaeth yn cael eu hategu gan adnoddau ariannol priodol.

Ysgwyddo cyfrifoldeb am reoli sefyllfa ariannol ar gyfer y maes dan sylw, ymchwilio i a chynghori ar faterion hynod gymhleth a darparu adroddiadau Rheoli a Chorfforaethol, cyngor ariannol a chyngor cynllunio busnes.

Mae hwn yn gyfle delfrydol i rywun sydd am ehangu eu sgiliau a'u gwybodaeth i ddatblygu gyrfa o fewn Cyllid ymhellach.  Rydym yn cefnogi datblygiad personol a phroffesiynol yn weithredol a byddwn yn gweithio gyda'r ymgeisydd llwyddiannus i gynhyrchu cynllun datblygiad personol. 

Gweithio i'n sefydliad

Ni yw Iechyd Cyhoeddus Cymru - asiantaeth iechyd cyhoeddus genedlaethol Cymru. Ein diben yw ‘gweithio gyda'n gilydd ar gyfer Cymru iachach'. Rydym yn bodoli i helpu pawb yng Nghymru i fyw bywydau hirach, iachach. Gyda'n partneriaid, ein nod yw cynyddu disgwyliad oes iach, gwella iechyd a llesiant, a lleihau anghydraddoldebau i bawb yng Nghymru, nawr ac ar gyfer cenedlaethau'r dyfodol. 

Gyda'i gilydd, mae ein timau'n gweithio i atal clefyd, diogelu iechyd, a darparu arweinyddiaeth, gwasanaethau arbenigol ac arbenigedd iechyd cyhoeddus. Ni yw'r brif ffynhonnell o wybodaeth, ymchwil ac arloesedd iechyd cyhoeddus yng Nghymru. Nid yw iechyd cyhoeddus erioed wedi bod mor bwysig wrth i ni ddod drwy bandemig y Coronafeirws, wynebu heriau'r argyfwng costau byw a mynd i'r afael ac atal effeithiau niweidiol newid hinsawdd.

Caiff ein sefydliad ei arwain gan ein gwerthoedd 'Cydweithio, gydag ymddiriedaeth a pharch, i wneud gwahaniaeth'. Rydym wedi ymrwymo i greu gweithle cynhwysol sy'n rhoi gwerth ar gydraddoldeb, amrywiaeth a chynhwysiant.  Rydym yn croesawu ceisiadau sy'n cynrychioli amrywiaeth gyfoethog y cymunedau rydym yn eu gwasanaethu a chan y rhai sy'n dymuno gweithio'n rhan amser neu rannu swydd.

I ddarganfod mwy am weithio i ni a'r buddion rydym yn eu cynnig, ewch i Gyrfaoedd - Iechyd Cyhoeddus Cymru (gig.cymru)

I gael arweiniad ar y broses ymgeisio, ewch i Gwybodaeth a Chanllawiau i Ymgeiswyr - Iechyd Cyhoeddus Cymru (gig.cymru)