HealthJobsUK

Trosolwg o'r swydd

Ydych chi'n nyrs gofrestredig brwdfrydig, tosturiol, blaengar, deinamig ac ymroddedig, sy’n chwilio am her newydd yn eich gyrfa o fewn sefydliad blaengar, sy'n canolbwyntio ar staff?  

Ydych chi'n angerddol ac wedi ymrwymo i ddarparu gofal o ansawdd uchel sy'n seiliedig ar dystiolaeth a gwella gwasanaethau parhaus?  Os felly, mae gennym ddewis gyrfa i chi.

Mae cyfle cyffrous wedi codi i Nyrs Gofrestredig band 5 yn ein tîm casglu gwaed hanfodol, wedi'u lleoli yn Dafen Llanelli o fewn Gwasanaeth Gwaed Cymru. Mae rôl nyrsio o fewn y gwasanaethau casglu yn rhoi datblygiad i staff o amrywiaeth o sgiliau clinigol a thechnegau casglu gan gynnwys casglu gwaed cyflawn.

Gan weithio fel rhan o dîm deinamig, mae rôl y Nyrs Casglu Gwaed yn rôl glinigol sy'n gyfrifol am gefnogi'r Nyrsys Cofrestredig Clinig Uwch a'r tîm casglu gwaed ehangach wrth ddarparu gofal unigol o ansawdd uchel i'n rhoddwyr sy’n achub bywydau.  Fel Nyrs casglu gwaed bydd disgwyl i chi ddarparu arweinyddiaeth glinigol effeithiol a thosturiol er mwyn sicrhau gofal gorau posibl o roddwyr.

Mae Gwasanaeth Gwaed Cymru wedi ymrwymo i ddatblygu ein staff a byddai ymgeiswyr llwyddiannus yn gwneud cynnydd trwy rhaglen hyfforddi gynhwysfawr ar sail ychwanegol i sicrhau eu bod wedi'u paratoi'n ddigonol gyda'r wybodaeth a’r sgiliau arbenigol angenrheidiol i ymgymryd â'r rôl glinigol allweddol hon. 

Prif ddyletswyddau'r swydd

Cefnogi'r Uwch Nyrs Clinig i sicrhau bod modd casglu'r gwaed mewn clinigau rhoddwyr yn ddiogel ac effeithiol.

Cefnogi'r Uwch Nyrs Clinig ym mhob agwedd ar nyrsio a gofal clinigol rhoddwyr, gan sicrhau amgylchedd diogel i bawb wrth weithio yn y clinig. Cael eich cydnabod fel ffynhonnell wybodaeth glinigol am gyngor a chyfeiriad i staff anghlinigol.

Bydd gofyn i'r holl staff symud yn hyblyg drwy wahanol dimau a chyfleusterau casglu gwaed fel cyfleusterau rhoi gwaed symudol, safleoedd statig a chlinigau cymunedol sy'n cwmpasu ardal ddaearyddol fawr.

Mae gofyniad y bydd deiliad y swydd yn cynnal teithiau wedi'u trefnu a fydd yn cynnwys arosiadau dros nos sawl gwaith y flwyddyn.

Mae’r gallu i siarad Cymraeg yn ddymunol ar gyfer y swydd hon; mae croeso i siaradwyr Cymraeg a/neu Saesneg wneud cais.

Gweithio i'n sefydliad

Yma yn Ymddiriedolaeth GIG Prifysgol Felindre, rydym yn hynod falch o'r gwasanaethau arbenigol rydym yn eu darparu ar draws Cymru yn ein Canolfan Ganser Felindre arloesol ac yng Ngwasanaeth Gwaed Cymru, sydd wedi ennill gwobrau, yn ogystal ag arbenigedd ein swyddogaethau corfforaethol sy'n dod â'r ddwy adran at ei gilydd. Rydym yn ffodus hefyd, i letya Partneriaeth Cydwasanaethau GIG Cymru a Technoleg Iechyd Cymru, ac rydym wedi datblygu gwaith partneriaeth cryf gyda'r gwasanaethau arbenigol hyn. 

Sefydlwyd yr Ymddiriedolaeth ym 1999, ac mae ganddi weithlu ymroddedig sy'n ymdrechu'n barhaus i ddarparu egwyddorion allweddol gofal iechyd darbodus drwy amrywiaeth eang o rolau. Rydym yn chwarae rhan hanfodol yn y cymunedau rydym yn eu cefnogi, ac mae gennym gynlluniau uchelgeisiol ar gyfer y dyfodol i barhau i wella'r gwasanaethau a ddarparwn. Rydym yn ymdrechu i gynnal ein gwerthoedd craidd ym mhopeth a wnawn drwy fod yn atebol, beiddgar, gofalgar a deinamig, a sicrhau'r gofal gorau posibl i'n cleifion a'n rhoddwyr.

Os ydych chi eisiau gweithio i sefydliad sy'n ymfalchïo mewn gwneud gwahaniaeth go iawn ac sy'n cynnig cyfleoedd gyrfa cyffrous, yna Ymddiriedolaeth GIG Prifysgol Felindre ydy'r lle i chi.

Ewch i'n gwefan i gael gwybod mwy https://felindre.gig.cymru/