HealthJobsUK

Trosolwg o'r swydd

Mae'r swydd hon yn swydd cyfnod penodol / secondiad tan 31/05/2025 oherwydd cyllid.

Os ydych yn gyflogai i Fwrdd Iechyd Prifysgol Hywel Dda ac yn gwneud cais am secondiad i'r swydd hon, bydd angen i'ch rheolwr presennol gytuno i'r secondiad cyn i chi gyflwyno eich cais.

Mae Tîm Nyrsys Ysgol Bwrdd Iechyd Prifysgol Hywel Dda yn chwilio am Nyrs Staff Gofrestredig Band 5 brofiadol i ymuno â'i dîm yn Sir Gaerfyrddin.

Mae'r swydd wag yn un am dymor penodol o flwyddyn yn unig, 30 awr yr wythnos, amser tymor yn unig.

Mae Nyrsys Ysgol yn ganolog i ystod o wasanaethau sy'n hyrwyddo agenda iechyd y cyhoedd ac yn cefnogi iechyd corfforol, emosiynol a chymdeithasol plant a phobl ifanc rhwng 5 a 18 oed.

Bydd angen sgiliau cyfathrebu rhagorol ar yr ymgeisydd llwyddiannus, a bydd angen iddo allu dangos ei allu i weithio fel ymarferydd ymreolaethol ac mewn amgylchedd tîm, yn unol â chod ymddygiad proffesiynol y Cyngor Nyrsio a Bydwreigiaeth.

Mae'r Gwasanaeth Nyrsio mewn Ysgolion yn awyddus i gefnogi unrhyw ddatblygiad proffesiynol parhaus er mwyn i'r ymgeisydd llwyddiannus wneud cais am rôl y Nyrs Ysgol SCPHN pe byddai ganddo ddiddordeb. 

Prif ddyletswyddau'r swydd

Cynorthwyo i asesu, cynllunio, gweithredu a gwerthuso gofal plant oed ysgol, a chynnal cofnodion cywir.
 
Cynnal prosesau cyfathrebu da â staff yr ysgol, cyd-weithwyr proffesiynol, plant ysgol a pherthnasau.
 
Cynnal a diweddaru gwybodaeth glinigol a, lle bo hynny'n briodol, cynghori ac arwain eraill, gan gynnwys myfyrwyr ac athrawon. 
 
Bod yn rhan o addysg iechyd plant oed ysgol a staff ysgolion sy'n briodol i ysgolion unigol, e.e. cyflwyno sgyrsiau ar dyfu i fyny ac addysg iechyd rhyw.
 
Yn unol â gweithdrefnau diogelu plant, bod yn ymwybodol o faterion ynghylch canllawiau/polisïau amddiffyn plant, a'r angen am ddogfennaeth a chyfathrebu effeithiol a chadarn. 
 
Cymryd rhan yn rhaglenni imiwneiddio ysgolion, gan roi brechlynnau i blant a phobl ifanc a choladu ffurflenni cydsyniad sy'n dod i law gan rieni. 
 
Datblygu a chynnal perthynas waith ag ysgolion, plant a phobl ifanc penodol, a lle bo hynny'n briodol, â'u teuluoedd. 
 
Blaenoriaethu'r llwyth gwaith i leihau'r risg i blant sy'n agored i niwed, a sicrhau'r iechyd mwyaf cydradd i bawb. 
 
Cyflawni adolygiadau o Asesiadau Iechyd ar gyfer Plant sy'n Derbyn Gofal, fel y'u dirprwyir gan y Nyrs Ysgol gyfrifol. 
 
Ymateb i hysbysiadau ynghylch presenoldeb mewn Adrannau Damweiniau ac Achosion Brys, yn unol â pholisi'r Bwrdd Iechyd; ar hyn o bryd, mae'r Bwrdd yn blaenoriaethu amddiffyn plant, neu blant eraill sy'n agored i niwed yn yr ysgol. 

Gweithio i'n sefydliad

Bwrdd Iechyd Prifysgol Hywel Dda yw cynllunydd a darparwr gwasanaethau gofal iechyd y GIG i bobl yn Sir Gaerfyrddin, Ceredigion, Sir Benfro a’r siroedd cyfagos. Mae ein 11,000 o staff yn darparu gwasanaethau sylfaenol, cymunedol, mewn ysbytai, iechyd meddwl ac anableddau dysgu ar gyfer tua 384,000 o bobl ar draws chwarter ehangdir Cymru. Gwnawn hyn mewn partneriaeth â’n 3 awdurdod lleol a chydweithwyr yn y sector cyhoeddus, y sector preifat a’r trydydd sector, gan gynnwys ein gwirfoddolwyr, drwy:

Pedwar prif ysbyty: Ysbyty Cyffredinol Bronglais yn Aberystwyth, Ysbyty Cyffredinol Glangwili yng Nghaerfyrddin, Ysbyty Tywysog Philip yn Llanelli a Ysbyty Cyffredinol Llwynhelyg yn Hwlffordd;

Saith ysbyty cymunedol: Dyffryn Aman a Llanymddyfri yn Sir Gaerfyrddin; Tregaron, Aberaeron ac Aberteifi yng Ngheredigion; a Chanolfan Adnoddau Iechyd a Gofal Cymdeithasol Ysbyty Dinbych-y-pysgod a De Sir Benfro yn Sir Benfro;

48 o bractisau cyffredinol (chwech ohonynt yn bractisau a reolir), 47 practis deintyddol (gan gynnwys tri orthodontig), 99 o fferyllfeydd cymunedol, 44 o bractisau offthalmig cyffredinol (43 yn darparu Archwiliad Iechyd Llygaid Cymru a 34 o wasanaethau golwg gwan) ac 17 o ddarparwyr gofal cartref yn unig ac 11 canolfannau iechyd;

Lleoliadau niferus yn darparu gwasanaethau iechyd meddwl ac anableddau dysgu;

Gwasanaethau tra arbenigol a thrydyddol a gomisiynir gan Bwyllgor Gwasanaethau Iechyd Arbenigol Cymru, cydbwyllgor sy'n cynrychioli 7 bwrdd iechyd ledled Cymru.